أنواعه ودرجاته ...❤️!!

الصورة محملة من موقع www.google.com لم يستدل على صانعها وكل الحقوق تعود الي صانعها الاصلي.

كنت لسه بحكي لصاحبي ...بقوله إن فيه انواع للحب ودرجات
يعني ايه بقى
انواع الحب زي حبك لوالدتك حبك لوالدك حبك لاخواتك حبك لاصحابك وحبك لصديقك الصدوق وحبك لحبيبتك وأنواع تانيه كتير.. تختلف باختلاف الطرف التاني لمعادلة الحب..
خلينا بقى في النوع بتاع حبك لحبيبتك

ده درجات

ازاي
اقلك انا
فيه حب بدرجة العبادة وده اول درجة بتخلي الطرف التاني متحكم فيك كلية سواء بيتحكم فيك ويوجهك للغلط أو متحكم فيك ويوجهك للصح...في الحالتين انت هنا اداه مش فاعل .. موجه معصوب العينين وده حب خطير ومُهلك للطرفين.
الدرجة التانيه: هي الحب اللي انت بتبقى شايف فيه ديفوهات أو عيوب حبيبك ده مميزات أو تحس ان العيب المعين ده فيه بقى مش عيب يعني مثلا الكسل عيب وانت بتكره الكسل بس الكسل في حبيبك بقى ليه اسم تاني "كسل حبيبي" فبقيت تحب الكسل بتاعه هو بس عشان بتحبه .. الحب ده بيخلك تطلع احسن ما فيك the best version of you
بيخليك تعمل حرفيا حاجات مستحيلة ..بيخليك تطير رغم انك مش سوبرمان ولا فيه جناحات في كتافك.
نيجي بقى للدرجة التالته: زي اللي فوق بس أقل درجة ..
ازاي بقى .. الحب ده انت بتشوف عيوب حبيبك عيوب فعلا وبتحاول تغيرها مش بالضرورة يبقى تأثيرها كبير عليك بس بتبقى سعيد نسبيا وانت هنا.
الدرجة اللي قبل الاخيره: وهي اللي بتشوف عيوب حبيبك عيوب وبتشوف اختلافاتكم مشكلة لازم لها حل وبتشوف مميزاته عادي مش حاجه واو يعني ..ودي علاقة مرهقة ..بس مش اكتر من اللي جايه.
النوع الأخير ومش عايز اصنفه درجة من درجات الحب إنما هو ممكن نقول عليه درجة من درجات الجبر ... اللي فيه بتضطر تختار بعقلك و بتجبر نفسك عشان تقول بحبك .. ده بتضطر ليه مجبور عشان اي ظرف من الظروف إما مفيش بديل أو انك كبرت ومحتاج شريك او انك زهقت من الوحدة .. فبتعمل وتمثل ايوه زي ما سمعتني بتمثل انك بتحب وانت وحظك بقى لو اتجوزت هتعرف تقلب التمثيل ده لدرجة من درجات الحب اللي فوق أو تعيش مشتت ومش مرتاح طول عمرك أو تنفصل عنها بأي صورة من الصور يا اما طلاق يا انفصال روحي يا خناق وزهق ونكد ... الخ.
لهنا اكون خلصت كلامي اللي طولت فيه
دي كل درجات الحب ... طبعا انا بفضل درجة الحب التانيه ..النادرة جدا ..بس مش المستحيل وجودها ..نسيت اقولك أن الطرفين أصحاب درجة الحب التانيه بيبقوا شبه بعض اوي جدا ... او من "كمال"حبهم بتدوب أرواحهم في بعض فبيتهيألهم أنهم مولودين كدا soul mates
سلام يا رفيق عشان معايا شغل. :)
#love #الحب #amore

بقلم سامح بدوي

الصورة محملة من موقع google.com لم يستدل على صاحبها